Yn gynharach eleni, roedd Gweithffyrdd+ yn falch o gynnwys Danielle mewn erthygl olygyddol a oedd yn disgrifio sut yr oedd hi wedi brwydro sciatica ac iselder er mwyn dechrau hyfforddi ar gyfer bywyd newydd fel technegydd ewinedd acrylig. Roedd hi’n trin gwallt yn wreiddiol, ond nid oedd yn bosibl iddi sefyll am gyfnodau hir oherwydd ei sciatica. Bu’n rhaid i Danielle ddod o hyd i alwedigaeth arall. Er gwaethaf cyfyngiadau covid-19, daeth Gweithffyrdd+ o hyd i gwrs ewinedd acrylig priodol a’i ariannu’n llawn. Cwblhaodd Danielle ei hyfforddiant ac roedd hi’n barod i chwilio am swydd. Erbyn hyn, mae gan Danielle swydd fel Prentis Technegydd Ewinedd gyda Skin Deep yng Ngwesty’r Conrah yn Aberystwyth.

Bu Wendy a Beti, staff Gweithffyrdd+ Ceredigion, yn cefnogi Danielle, ac maent wrth eu bodd.

Dywedodd Danielle, “Mi rydw i lle rydw i diolch i Wendy a Beti, a dydi dweud ‘diolch’ yn unig ddim yn dod yn agos at gyfleu pa mor ddiolchgar ydw i.”